رئيس التحرير: جمال الشناوي
متابعات

نكد في البيوت بسبب صافيناز


  ممدوح الصغير
8/23/2016 12:54:01 PM


الشاويش "هـ" أشهر واحد في قسم الشرطة اللى شغال فيه من 20 سنة.. دخله عسكرى.. وبسبب حلاوة لسانه الكل بيحبه, كل حد عنده مشكلة فى الحتة يروح له.. واصبح له سلطة ونفوذ عند الناس الغلابه.
فى ليلة كان البيه ضابط المباحث فى مأمورية والباشا المأمور فى المستشفى بيعمل عملية, والقسم فاضى وفجأة وجد الشاويش "هـ" القسم اتملى ناس.. كلهم ستات جايين يشهدوا مع جارتهم "ام هاشم" اللى جايه القسم عاوزة الحكومة تقبض على ابوهاشم لإنه ضربها.. بعد أن ضبطته بيتفرج على صافيناز فى قناة الأفلام.
وام هاشم شافت زوجها عيونه بتاكل فى صافيناز، راحت قايمة بسرعة وطفت التليفزيون ابوهاشم حس  بالعكننة واستبداد ام هاشم القوية والمفترية وراح  قايم هو  ولسانه   بيمطر كلام بألفاظ وحشة قوي  صعب على ست  تسمعها..
ام هاشم ما سكتتش قالت له  صافيناز مين يا راجل اللى عيونك بتاكل في  جسمها, انت خلاص سلمت نمر, يا راجل عيب دى فى عمر بنتك "نوال" اللى خطوبتها الشهر الجاى.
الكلام  اللي نزل من لسانه زي ضرب الكرباج على ابوهاشم وكانت العلقة سخنة وعلى صويت ام هاشم اتجمعت ستات العمارة اللى جايين يشهدوا معها, معذرورين وخايفين ازواجهم يتفرجوا على المفروسه صافيناز اللى لما تطلع فى التليفزيون كل الرجالة بيبقوا خارج الوعى بسبب المياصه والدلع اللى فى البنت.
الشاويش سمع الكلام وهز راسه ومسك شنبه.. وشخط فى كل الستات روحوا وإلا افتح الحجز, وبص على ام هاشم وقال لها.. يا ست كونى كويسة مع زوجك، عارفة لو  انتي كويسة معاه.. لو صافيناز جت البيت عمره ما حيبص عليها.
يا ست خلى بالك من زوجك وانتوا يا ستات كل واحدة تخلي  بالها من  زوجها والا صافيناز كل ساعة طالعة فى التليفزيون, انا نفسى لما مراتى تزعلنى بجيب قنوات الأفلام واتفرج على صافيناز.
صافيناز  الفرجة  عليها مش عيب ولا حرام.


الكلمات المتعلقة :