رئيس التحرير: جمال الشناوي
متابعات

بسبب ثانوية د.الهلالي "اللي عاوز يطلع مهندس دخل حقوق"


  
8/30/2016 12:57:28 PM






الولد هريدى زعلان علشان معرفش يحقق امنية ابوه الحاج وهدان اللى طول عمره بيناديه يا باشمهندس هريدى،
الحاج وهدان عرف بذكاء ابنه من ناظر مدرسه كفر الذهب جنوب الاقصر، و الناظر قال ابنك ما شاء الله يا حج شاطر و نبيه، ولو استمر كده ان شاء الله هيطلع مهندس.
الحاج وهدان من يومها بينادى ولده هريدى بالباشمهندس اللى رفع راس ابوه و طلع الاول فى الابتدائيه وجاب 99% فى الاعدادية جاب 99%.
وفى الثانويه العامه، كبرت احلام الحاج وهدان اللى اشترى عجل لبانى اول رمضان وقال انه يذبحه لوجه الله عند سماع النتيجه.
اول ماده هريدى طلع فرحان، ابوه ضرب كام طلقه بالبندقيه اللى ورثه عن جده، واللى بتطلع مره كل سنه لو كان فى ليلة زفاف او فرح.
ويوم الانجليزى رغم الصيام الحاج وهدان كان قاعد امام المدرسه، الجو حر ولكن مستقبل ابنه اهم، الولد طلع فرحان قال تمام يا حج وحياة تربة جدى لاحقق حلمك.
ويوم الفيزياء الحاج وهدان دخل المستشفى ضغطه ارتفع بعد ان عرف ان الامتحان صعب، لما شاف ولده هريدى لمه نظره ومعه فى عيونه، وقال له الامتحان صعب يا ولدى، هريدى هز دماغه ايوه يا حاج.
الحاج قال لولده قول يارب يا ولدى، فى الرياضه خرج الوالد فرحان لكن معالى البيه الوزير قال الامتحان يتعاد لان فيه تسريب، الحاج وهدان قال اعادة ايه، إحنا بنشوف النليفزيون بالعافيه انت ايه و فيس ايه اللى هريدى عارفه، ولدى اخره الجامع يصلى وراء الشيخ عثمان و يروح يذاكر وينام من عشره و يصحى على اذان الفجر علشان يلحق صلاة الصبح جماعه ورا الشيخ عثمان.
خلصت الامتحان، الحاج وهدان يصلى طول الليل، مراته سمعته بيدعى و يبكى يارب الولد يدخل الهندسه، يارب خد منى عمرى و يطلع هريدى مهندس.
يارب انا عمرى ما طلبت منه حاجه قبل كده، طول عمرى راضى باللى مكتوب ليه عندى فيرس سى قلت الحمد لله والدكتور قالى يا حاج عن الفيرس و يمكن تتعالج قريب، قلت له يا دكتور الشافى ربنا ومروحتش تانى للدكتور.
ويوم النتيجه الحاج وهدان اتصل بخال هريدى و قال تعالى نروح الاقصر نشوف حد معاه كمبيوتر نجيب النتيجه من النت.
راح هريدى و ابوه و خاله، ضربوا الرقم، لما قرأ هريدى درجته بكى زى العيال الصغيره، ابوه عرف الحلم ضاع، قال يا ولدى جبت كام، قاله 89% يا ولدى.
سكت الحاج، دى متوديش الهندسه هز راسه هريدى، لا يا حاج، امال تودى فين دى.
ممكن ادخل حقوق بيها، الدمعه فطت من عين الحاج.
وهدان: بلدى ايه دى، اللى عاوز يطلع مهندس، يبقى محامى، استغفر الله العظيم.
الوزير اللى عمل كده اسمه ايه يا هريدى، الولد يرد يا ابويا، الدكتور الهلالى الشربينى وزير التعليم.
الحاج قال كلمه واحده، روح منك لله يا هلالى، خسارة الاسم فيك، الهلالى كان فارس الله يرحمك يا ابوزيد.


الكلمات المتعلقة :

وزير الداخلية