رئيس التحرير: جمال الشناوي
متابعات

ابونسمة ضرب حرمه بسبب مصطفي فتحي


  ممدوح الصغير
9/6/2016 8:26:52 PM


الشاويش همام طول عمره يكره نبطشية ليلة الاهلى و الزمالك، يومها يقعد يدعى ان الليله تعدى على خير بسبب خناقات الازواج و المقاهى، و الشاويش همام زملكاوى من زمان وقع فى غرام الساحرة المستديرة هو عيل صغير، وبقى زملكاوى لانه اول لما اتفرج على كوره كان ابو خطين حمر مليء بالنجوم جعفر و شحاتة و ابن الاصول طه بصرى، فرقة تبسط صاحبها ولما يخلص الماتش يحس كل زملكاوى انه اكل كيلو كباب بلدى من جمال كورة الزمالك .
بسبب الشغل و أكل العيش بعد همام عن تشجيع الزمالك و ليلة مباراة الزمالك مع الاهلى فى كاس مصر صلى المغرب و هو ساجد دعى ان الليلة تعدى على خير .
و بعد المباراة بساعة كان الشاويش همام نبطشى و سمع صوت العسكرى وحيد بينادى على ست اللى دخلت تجرى و شعرها سايب ولابسة عباية فاضحة ومعرية جسدها .
اول ما لقت الشاويش همام قالت له الحقنى يا شاويش ابونسمة ضربنى علقه موت علشان انا رقصت لما مصطفى فتحى جاب الجون و شتمنى وقالى يا واطيه انتى لم مرقتصيش لي في ليلة زفافك و بترقصى علشان الزمالك جاب جون و اخد الكاس
وكمل يا حضرة الشاويش بكلام وحش قال لي هو مصطفى فتحى عجبك يا ست .. علشان كلامه الوحش انا رديت عليه ورفعت ضغطه وقلت له:
هو ولد زى القمر .. بعدها معرفش حصل ايه ضربنى بالبوكس زى كلاى ..
لما حسيت بنفسى قمت لبست العباية وجيت هنا علي طول.
وقامت ام نسمة واقفة ومالت بجسمها على الشاويش همام اللى وشه جاب عرق من كل حته .
وقالت له شوف وشى ورم ازاى .. سمراء نسيت تقفل العباية من فوق .. تعاطف الشاويش معها و قال ابو سامية راجل مش تمام .. فيها ايه لما الزمالك يغلب الاهلى .
انا افتح لك محضر .. ونادى على العسكرى وحيد علشان يجيب حاجه ساقعه للست سمراء .
مسك الشاويش همام القلم و قال احكى يا مدام ..
وبدأت ام نسمة تحكى وقالت عارف يا حضرة الشاويش زوجي طول عمره كابس على نفسى و مشربنى المر .. يوم مباراة الاهلى الاخيره قعد .. لما الزمالك جاب الجون الاول شافنى فرحانه قالى قومى اعملى شاى ولما باسم جاب التانى طلب اجهزله عشاء دخلت المطبخ فى عز الحر .. وجهزت له العشا ولما الزمالك جاب التالت غصب عنى فرحت ورقصت انا لي سنه زعلانة يوم ماتش السوبر .. هو حرام افرح يا شاويش .
عارف حضرتك ابو نسمة عمل ايه يوم الاهلى ما فاز على الزمالك فى السوبر اللى اتلعب فى الامارات السنة اللي فاتت.. عمل دماغ و شرب حشيش و كان عاوزنى اشرب معاه لزوم الفرفشة .
يرضيك يا شاويش اغضب ربنا علشان هو يفرفش علشان الاهلى هزم الزمالك .
سكت الشاويش .. وبص عليها .. بجنيه وقال ابونسمة راجل مش تمام .يضربك ويعورك علشان الزمالبك فاز بالكاس وفيه ايه لما الزمالك يفوز بالكاس مش لعب وكان احسن من الاهلي ، هو الزملكاوية حرام عليهم يكسبوا الاهلي .
ومسك الشاويش همام شنبه وبص علي ام نسمة وتنهد قال اطمني الحكومة حتجيبك حقك، انصراف يامدام

الكلمات المتعلقة :

الشاويش