رئيس التحرير: جمال الشناوي
متابعات

حكاية بنت الاكابر مع الشاويش همام


  ممدوح الصغير
9/18/2016 10:38:01 PM

بعد ما مشي البيه المأمور بدأ الشاويش همام يستعد للنوم، يريحه ساعتين و يقوم مع ظهور اول نور من اليوم الجديد يصلي الفجر و يفطر فول من عربية ام ساميه اللى الناس عليها زى النحل علشان يشوفوا ساميه.
الشاويش همام طول عمره مغرم بساميه ولو كانت كبيره كان طلبها للزواج.
وقبل ما يحط راسه سمع صوت زعيق فى القسم، عربية النجده جايبين 3 بنات وولدين مسكوهم فى عربيه على الدائرى بيشربوا خمره و حشيش.
عربية النجده قبضت عليهم، وسلمتهم للشاويش همام علشان يعمل محضر ويعرضهم على البيه المأمور قبل مايرحوا النيابه.
مزاج الشاويش همام اتعكر بعد ما شاف لبس البنات، كان نص جسمهم باين، وقعد يقول فى سره استغفر الله العظيم ، بدأ يبص عليهم، طلب من الكل بطاقته، بنت رفيعه شايفه نفسها زعقت فيه، قالت انت عارف بتكلم مين، انا بابا ممكن يسجنك، انا بابا صاحب شركه "........" لما نطقتها عرفها الشاويش همام لان اعلاناتها بتيجى فى التليفزيون ايام الماتشات.
سكوت الشاويش همام فرح بنت المليونير وافتكرت انه خاف من اسم ابوها، وشجع صاحبها تامر اللى حب يعمل منظر على الشاويش همام و قال له انا ابويا فنان كبير، لو عرف انى هنا الدنيا هتخرب فوق دماغك، ولع الشاويش همام سيجارته وشرب بق شاى و نادى على العسكرى وحيد، وقال افتح الحجز لولاد الاكابر، عاوزهم فى زنزانه تليق بهم، وكتب المحضر وبلغ جناب المأمور، اول ما يوصل دخل له المحضر و خدهم على النيابه على طول، هى صاحبة الامر.
والبنت سالى بتقول ابوها مليونير واصل قوى، كمان الاخ اللى عامل زى البنت بيقول ابوه فنان كبير وقبل ما يمشوا من قدام الشاويش همام، شخط فيهم وقال لهم الحكومه ما بتخافش من ابناء الكبار لان القانون على الكبير و الصغير، لو انتم فعلا ولاد ناس و اهليكم عرفوا ازاى يربوكوا مستحيل تتمسكوا على الدائرى بفعل فاضح و خمره، احنا فى القسم ما بنظلمش ابداً، المحضر يتكتب و يرسل الى النيابه هى صاحبة الامر، افراج حبس .. احنا جزء من العداله و القانون.
نصيحه يا اولاد الاكابر اياكم تفرحوا بمناصب و ثراء اهاليكم، انا راجل غلبان بس شغلى فى الحكومه بيخلينى كبير، لو جارك الباشا وزير الداخلية مش هينصرك علي او على الحق.
انا قوتى اننى انفذ القانون و كل ما انفذ القانون الباشا وزير الداخلية يبقى فرحان رغم انه ما يعرفنيش، بس هو عارف القانون اللى انفذه على كل مخالف و مجرم.

الكلمات المتعلقة :