رئيس التحرير: جمال الشناوي
متابعات

خطوبة بنت جناب العمدة


  ممدوح الصغير
11/5/2016 5:15:18 PM


العمده طه الحلواني دعى لإجتماع عاجل مع عياله من اجل التشاور فى قصة عريس بنته هبه اللى رفضت كل عرسان البلد علشان تكمل علامها ورفضت الزواج من ابن عمتها علاء لأنها عاوزه تتزوج من قاضى او ضابط شرطة.
وهبه اتخرجت من كلية الحقوق السنة دى وطلعت بتقدير جيد جداً وناوية تقدم فى مسابقة النيابة الإدارية اللى حتعلن عنها وزارة العدل بعد شهرين.
عريس بنت جناب العمده مش من كفر العنب، هو الباشا هيثم معاون مباحث البندر، سبق له شاف هبه مرتين لما كان بيحقق فى مقتل ام الحاج عوض، ومن يومها اصبح متابع لأخبارها ولما عرف انها نجحت فى آخر سنة فى الكلية خلى العميد عباده مأمور البندر يكلم العمده فى قصة زواجه.
جناب العمده كان عاوز يرقص من الفرحة لما المأمور قال له حكاية زواج بنته هبه، هو طول عمره معجب بهيثم باشا لإنه راجل مؤدب، وبيعامل كل الناس بأدب، ولسانه لا يخرج منه الا الكلام الحلو.
بعد مقابلة العمده مع جناب المأمور رجع بدرى على البيت اول ما دخل نادى على ام طلعت وأخبرها بالحكاية اللى سكتت شوية وقالت له بس يا عمده، دا غريب مش من البلد، ضحك العمده وقال بلد ايه اللى بتتكلمى عليها، هى البلد فيها زى اخلاق هيثم باشا.
بعدين دا من المنصورة جنبنا وناسه اكابر، أخوه مستشار كبير وأخته مهندسه وابوه الله يرحمه كان دكتور كبير قوى، يا ام طلعت كلنا مصريين، لو كان من آخر الدنيا كفاية اخلاق الراجل، ونادى على عياله وبالصدفة كان ضياء موجود وجاب بنته هبه وقال له فى عريس جاى يتقدم لك، قبل ما يكمل كلامه اعرفي هو مين، الضابط هيثم معاون البندر طالب الزواج منك.
اتكسفت هبه وخرجت طايره من قدام العمده، واتكلم ضياء وقال والله يا جناب العمده هو عريس كويس، ابن ناس وبيخاف ربنا وبيتعامل مع الناس كويس، انا شوفته 3 مرات ومره كان مسافر معايا فى القطر من شهرين.
وافق يا جناب العمده، دا عريس كويس وله مستقبل.
ولما اتكلم هلال العمده قلب وشه بسبب كلامه اللى زى الدبش، هلال قال يا جناب العمده هبه الأفضل ان تتزوج حد من عيال عمنا، حرام يا عمده ارضنا تطلع للغريب، هبة يا جناب العمدة لها 5 افدنه.
شخط العمده فى هلال وقال له طول عمرك بتاع فلوس، يا ولدى عمر الفلوس ما صنعت مجد للناس، العلم والأخلاق تاج على رؤوس العائلات.
يا ولدى انت لسه صغير، الأفضل فى النسب انك تدور على الأصل، عمر الفلوس ما عملت بنى آدمين.
وجه الدور على طلعت فى الكلام اللى اتكلم بصوت عالى وقال يا جناب العمده طيب الباشا هيثم كل 3 سنين بيروح مكان، اختنا حتعيش فين يا جناب العمده، انا شايف ابن عمتى علاء الحلوانى هو الأنسب ليها، اهو من البلد وعنده مزرعه ومشروع كبير فى الجبل وممكن يخليها تشتغل محاميه فى البندر.
واهوه تبقى قريبه عليك وعارفين بيتها فين، مش كل 3 سنين تعيش فى بلد، زعق العمده فى طلعت وقال له تصدق بالله انا عارف انى حسمع كلامك الماسخ دا، كلام مالهوش طعم.
شوف يا ولدى انا عارف انك مابتحبش هيثم باشا من يوم ما قبض عليك بتلعب قمار فى مولد الشيخ هاشم وسابك عشان خاطر عيونى، شوفو يا عيال، كلامى هو اللى حيمشى، هيثم حيتجوز من هبه لأنه عريس كويس وابن ناس، ونادى على هبه وقال لها خلاص انا وافقت على زواجك من الباشا هيثم، وقال لمراته افرحى يا ام طلعت الأسبوع اللى جاى نقرأ فاتحة هبة، عقبال اختها اسماء.

الكلمات المتعلقة :

ممدوح الصغير المصطبة