رئيس التحرير: جمال الشناوي
متابعات

نصيحة البيه المأمور للشاويش همام


  ممدوح الصغير
11/5/2016 5:18:09 PM


البيه المأمور حس ان الشاويش همام زعلان وفي حاجة معكره مزاجه, لأنه شافه ساكت ولم تصدر منه الاصوات اللى بيعملها كل يوم لحظة استلامه للنبطشية.
دخل المأمور مكتبه ونادى على العسكرى وحيد وقال له هات الشاويش همام واعمل له قهوة مانوا اللى بيشربها كل ليلة.
دخل الشاويش همام باين انه زعلان من حاجة واخده فكره.
جناب المأمور عزم عليه بسيجارة اتكسف همام ياخدها، لكن الباشا المأمور حلف بالطلاق على ان يشرب السيجاره مع قهوته المفضله وقاله مالك يا همام, فى ايه، حد من العيال عيان.
رد همام، لا يا جناب المأمور العيال بخير.
جناب المأمور:
اومال فى ايه مالك مش زى كل يوم فين الإبتسامة.
رد الشاويش همام، الوليه ام اسماعيل مراتى حتجننى يا جناب المأمور، ست ايدها سايبه، كل يوم تاخد منى 50 جنيهاً مصروف البيت وقبل العشا تقول عاوزه 20 جنيهاً كمالة مصروف.
طيب حجيب منين يا جناب المأمور.
انت عارف المرتب، رغم زيادة الباشا الوزير لينا، المرتب لا يكفى، احنا ماشيين بستر ربنا.
زيادة الباشا الوزير بلعتها دروس اسماعيل، تخيل جنابك هو فى تالتة اعدادى بياخد دروس كل شهر 500 جنيه، غير اخته منه 200 رغم انها فى خامسة ابتدائى، دا غير 10 جنيه مصروف للإثنين كل يوم.
والحمد لله انهم فى مدرسة حكومة معفي من المصروفات والتعليم مجانى، رغم ضيق الحال يا جناب المأمور انا راجل عاوز اعيش بالحلال انا هنا من 20 سنة بفضل الله عمرى ما قبلت سيجارة من صاحب بلاغ.
الباشا الوزير عاوز مننا اننا نكون محترمين ونموذج للشرف، الحمدلله عمرى ما قبلت هدية، لو جه حد من اهل الحته اعمل الواجب وزيادة لإننى انا الكبير، انا اشتغل فى الداخلية وزارة البشوات.
عارف انا مش غنى ولكن ربنا ادانى هيبة بسبب البدلة اللى لابسها وهى بدلة تشرف، وانا الحمدلله طالما متقى الرحمن ربنا سترها معايا.
بص جناب المأمور على همام وقال له، انت فكرك انا مش معى مشاكل زيك، مشاكلك سهله يا همام، مشكلتك 20 جنيه كل يوم عشان تكمل مصروف البيت شوف يا سيدى انا عندى ايه، انا كل سنة مطلوب منى 50 الف جنيه مصروفات شهاب فى الجامعة الالمانية، اتحايلت عليه يدخل شرطة ويبقى زيى قال انه عاوز يدرس مدنى فى الجامعة الألمانية علشان يسافر بره مصر وبنتى اسراء ظلمها المجموع فى درجات ودخلت كلية الصيدلة فى جامعة خاصة كل سنة عاوزه 40 الف جنيه دا غير الباص.
ورغم كده انا بقول يا رب وبتمشى، اهم شئ نراعى ربنا فى شغلنا علشان ربنا يبارك لنا فى عيالنا.
بص يا همام قصة ام اسماعيل سهله خليها تشترى من مجمعات الحكومة فيها حاجات رخيصة ومتوفره، انا عارف الدنيا غاليه ولكنها فترة وحتعدى واسمع منى آخر كلمة طالما عيالك بخير قل الحمد لله، يلا على شغلك يا حضرة الشاويش وكل ما تضيق بك الدنيا قل يا رب وصلى ركعتين، انت احسن من غيرك.

الكلمات المتعلقة :

ممدوح الصغير وزير الداخلية الشاويش همام